Изоҳ қолдириш
Ўзбекистон Республикаси Президентининг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида» 2018 йил 26 июндаги ПҚ-3802-сон қарорига мувофиқ хўжалик юритувчи субъектлар томонидан электрон ҳисобварақ-фактуралардан фойдаланишни жорий этиш мақсадида, Вазирлар Маҳкамасининг «Солиқ маъмуриятчилигида замонавий ахборот-коммуникация технологияларини қўллашни кенгайтириш чора-тадбирлари тўғрисида» 2018 йил 6 октябрдаги 807-сон қарори қабул қилинди.
Қарорга мувофиқ хўжалик юритувчи субъектлар томонидан ҳисобварақ-фактураларни электрон шаклда расмийлаштириш тизимини жорий этиш бўйича 2018 йил 15 октябрдан 2019 йил 1 февралга қадар Тошкент вилоятининг Чирчиқ шаҳри, Навоий ва Сирдарё вилоятлари ҳудудида тажриба ўтказилди.
Тажриба лойиҳасини ўтказиш жараёнида 17 мингдан ортиқ хўжалик юритувчи субъектлар электрон ҳисобварақ-фактуралар тизимидан фойдаланишди.
Тажриба лойиҳаси натижаси бўйича Вазирлар Маҳкамасининг 2019 йил 25 июндаги “Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланишни такомиллаштириш чора-тадбирлари тўғрисида” 522-сонли қарори қабул қилинди. Қарорга мувофиқ республика ҳудудида 2019 йил 1 июлдан бошлаб ихтиёрий равишда, 2020 йил 1 январдан бошлаб барча хўжалик юритувчи субъектлар учун ҳисобварақ-фактураларни электрон шаклда расмийлаштириш, сақлаш ва ҳисобини юритиш тизимини мажбурий тартибда жорий этиш белгиланган.
Қарор билан “Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби тўғрисида”ги Низом тасдиқланган ва қўйидаги янги тушунчалар киритилган:
-электрон ҳисобварақ-фактура айланиш тизими оператори (кейинги ўринларда оператор деб аталади)
— қонун ҳужжатларида ва ушбу Низомда белгиланган талабларни бажарган ЭҲФларнинг айланиши ва уларни сақлаш фаолияти билан шуғулланишга рухсат этилган юридик шахс мақомига эга ахборот воситачиси;
-электрон ҳисобварақ-фактура идентификатори -
ЭҲФни масофадан идентификация қилиш имконини берувчи роуминг операторининг ахборот тизими томонидан автоматик равишда белгиланадиган ЭҲФнинг ўзига хос рақами;
-роуминг оператори –
ЭҲФларнинг марказлаштирилган ҳолда сақланиши, операторлараро узатилиши ва ҳисоби юритилишини таъминлайдиган юридик шахс;
Электрон ҳисобварақ-фактураларнинг тизимидан фойдаланиш қандай афзалликларга эга?
Биринчидан,
электрон ҳужжатларни тезкор ва кафолатли этказиб беришни таъминлайди. Электрон ҳисобварақ-фактураларни шакллантириш ва уни энг узоқ ҳамкорларга юбориш учун бир неча дақиқа вақт кифоя қилади. Сизга қоғоз ишлари ва куръерлар билан боғлиқ қийинчиликлар ва харажатлардан қочиш имконини беради;
Иккинчидан,
электрон ҳисобварақ-фактуралар анъанавий қоғоз ҳисобварақ-фактурани тайёрлашда сарф қилинган моддий ва инсон ресурсларини тежайди ва кераксиз харажатларнинг олдини олади;
Учинчидан,
электрон алмашинув ишончли ва қонуний. Тизим хавфсиз ва серверларда электрон ҳисобварақ-фактураларнинг узоқ муддат сақланишини ва қайта ишланиши амалга оширилган электрон битимларнинг ҳуқуқий аҳамиятини таъминлайди;
Ва ниҳоят, тўртинчидан,
Бухгалтерия ҳисобининг бирламчи ҳужжатларини шакллантириш тартиби соддалаштирилади. Ҳисоб-фактуранинг электрон тизими ҳисоб-китоб ва бухгалтерия дастурлари билан интеграциялашиш имконини беради.
E-factura тизими - бу солиқ органларининг электрон давлат хизматлари порталида жойлашган солиқ тўловчиларнинг шахсий кабинети орқали контрагентлар ўртасидаги электрон ҳисобварақ-фактуралар ва электрон ҳужжат айланиш тизимидир.
E-factura тизими Ўзбекистон Республикаси Президентининг 2018 йил 26 июндаги ПҚ-3802-сонли “Давлат солиқ хизмати органлари фаолиятини тубдан такомиллаштириш чора-тадбирлари тўғрисида” ги қарори асосида ишлаб чиқилган.
Ушбу электрон хизматдан солиқ органларининг электрон давлат хизматлари порталида шахсий кабинет орқали рўйхатдан ўтгандан кейин фойдаланиш мумкин.
Ҳудудий органлар
Изоҳ қолдириш
Сайтда хато аниқланди!